কিবা যেন নাই

কিবা যেন নাই আজি নাই

আছে হুমুনিয়াহ হতাশ হিয়াৰ

কৰুণ বিননি ‘হায় হায়’ ।

মেলিলি ধুমুহা তাইৰ ক’লা চুলিটাৰ

লুকুৱাই তৰা জোন কৰে যে এন্ধাৰ ।

ক’তেনো বা অকৰুণ সেই কাৰাগাৰ

য’ত মোৰ প্ৰিয়া আছে মোৰ হিয়াত নাই ?

গৰজি ডাৱৰ তুলি বিজুলী নিচান

দিয়ে শাওনৰ বাৰিষাৰ সমিধান

ঘনে ঘনে কঁপে মোৰ চকিত পৰাণ

লগে লগে হয় মোৰ জীৱন বিষাণ ।

বাহিৰত বৰষুণ পৰে ধাৰাষাৰ

দুগালেদি বয় মোৰ চকুলো দুধাৰ

উচাটন কৰে মোৰ মন যে এষাৰ

‘মোৰ প্ৰিয়া নাই ! মোৰ প্ৰিয়া নাই’ ।।